Muqdisho ( HM)-Jamaal Maaxmed Xasan Wasiirka Qorshaynta xukuumadda Soomaaliya oo maanta fadhiga golaha shacabka ka hor akhriyey xeerka Shirkadaha aan dowliga ahayn, ayaa sheegay in dalka ay ka howlgalaan hey’ado shisheeye oo aan ogoleyn in lala xisaabtamo.
Wasiirka ayaa yidhi “Waxyaabo fara badan ayaa dalka soo gala hadey noqon laheyd deeqo ama mashaariic hey’adahaas caalamiga ah ayaana gacanta ku haya, waxaad arkeysaa xildhibaan ama wasiir doonaya si deegaankiisii uu mashaariic uga fuliyo u maro NGO oo hey’adaha dowladda aan u soo marin.”
“Mararka qaar waxay dhibaato weyn ka dhalataa inay deegankooda u daba fariistaan hey’adahaas, meeshii laga rebay in wasaaradda shaqadaas iska leh ay u yeerto oo kula xisaabtanto hey’addii shaqadaas qabatay.”
“Waxaan rabaa golaha in aan ka hor cadeeyo wadankan waxaa jooga 132 hey’adood oo caalami ah, waa inta aan ognahay, intooda badana waxa ay qabtaan shaqooyinkii looga baahnaa hey’adaha dowladda, marka waxaan u baahanahay sharci kala cadeynaya meesha ay ka bilaabaneyso shaqada hey’adda aan dowliga aheyn iyo meesha ay ku egtahay iyo sidii ay hey’adaha dowladda ay ugu wareeji lahaayeen shaqooyinka ay qabtaan.” Ayuu yidhi Wasiir Jamaal.
Ugu dambeyntii Wasiirka ayaa sheegay inay jiraan waxyaabo badan oo is daba marsan, sidaas darteed xildhibaanada golaha shacabka looga baahanyahay inay sharcigaas ay soo akhriyaan, oo ay ka fiiriyaan dhinac walba sida, xaquuqul insaanka, dastuurka, xuquuqda gaarka ah ee shacabka Soomaaliyeed, iyo xuquuqda ay leeyihiin hey’adaha caalamiga ah.
Cabdiweli Sheekh Ibraahim Muudey guddoomiye ku xigeenka koowaad ee golaha shacabka ayaa isna kulanka golaha ka hor sheegay, in hey’adaha 132-da ah ee uu wasiirku sheegay inay dalka joogaan aan lala xisaabtami karin, sida uu hadalka u dhigay.
Horufadhi News
Wasiirka qorsheynta Soomaaliya.
@Horufadhi News
