Laacaanood (HM)-Baraha ay bogga Twitter-ka ku leeyihiin madax iyo maalqabeeno Mareykanka ah oo ay ku jiraan Barack Obama, Bill Gates, Joe Biden iyo shirkado waaweyn ayaa la jabsaday, saacadihii u dambeeyay.
Shirkadda Twitter-ka oo xaqiijisay dhacdooyinkan ayaa xustay in ay ka shaqeyneyso sidii ay dib ugu soo celin lahayd ciwaanadaas oo qaarkood lasoo dhigay fariimo, wallow kolkii dambe laga masaxay.
Warar horudhac ah ayaa tilmaamaya in kooxda ka dambeysay falkaan ay codsaneyso dhaqaale ay sheegeen in ay ugu deeqi doonan dad tabaaleysan, balse, illaa iyo hadda lama ogaan waxay yihiin.
Warbaahinta caalamka ayaa warineysa in weerarkan Internet-ka ah uu yahay mid abaabulan, inkasta oo aysan carabaabin cidda ka dambeysa, marka laga reebo in ay xuseen in ay ku lug lahaan karaan shaqaale Twitter ka tirsanaa.
Warbixinada ayaa intaas ku daraya in qaar kamid ah ciwaanada lagu guuleystay in dib loosoo celiyo, wallow uusan jirin war rasmi ah oo illaa iyo haatan kasoo baxay shirkadda Twitter-ka iyo madaxdii lahayd barahaas.
Jabsashadda ciwaanada baraha bulshadda ayaa soo kordheysa sanadihii lasoo dhaafay, gaar ahaan kuwa ay leeyihiin shaqsiyaadka caanka ah, waxaana ay qayb ka tahay loolanka ama hardanka hogaaminta tiknoolajiyada dunida.
Halkan ka dheeho qaarkamid ah Ciiwanada la jabsaday.
Baraha bulshada ayaa sanadihii u dambeeyay kaalin weyn ku lahaa ololaha doorashooyinka madaxtooyadda Mareykanka iyo qaar kamid ah wadamada caalamka, waana halka laga abaabulo isu soo baxyadda taageereyaasha.
Horufadhi News
