Golaha Wasiirada ee Xukuumada Federaalka Soomaaliya ayaa maanta soo saaray go’aano lagu ayidayo mowqifkii dowladda ka qaadatay khilaafkii Khaliijka, kaasoo ahaa mid dhex dhexaadi ah.
Kusimaha Ra’iisul Wasaaraha ahna Ra’iisul Wasaare kuxigeenka oo shir guddoominayay kulanka ayaa sheegay muhiimada illaalinta sharciga iyo nidaamka dowladeed, kadibna Golaha Wasiiradu iyagoo tixgelinaya xaalada dalku ku sugan yahay ayaa waxey isla garteen arrimahan ku aadan mowqifka Soomaaliya ee ku wajahan khilaafka Khaliijka Carabta:
HALKAN RIIX DAAWO VIDEO
1. Golahu waxey si adag u ayideen mowqifkii Dawladda Federaalka ee bishii Juun 2017 ee qeexayey in Soomaaliya ay door dhexdhexaad ah ka taagan-tahay muranka wadamada khaliijka qaarkood, una aragto in khilaafka jira lagu xaliyo si nabadgelyo ah oo ay wallaaltinimo iyo diblomaasiyad ku dheehan tahay.
2. Dawladda Federaalka Soomaaliya waxey ku guuleysatay wadashaqeynta Dawladda Dhexe iyo dawlad goboleedyada xubnaha ka ah dowladda Federaalka, iyadoo qabatay labo shir lixdii bilood ee ugu danbeysey, taasoo ay muhiimadeedu aheyd ka wada shaqeynta xoojinta amniga iyo midnimada qaranka.
3. Sida ku cad qodobka 54aad ee Dastuurka KMG ah ee Soomaaliya, Dowlada Federaalka oo kaliya ayaa awood u leh go’aan ka gaarista arrimaha dibedda, Difaaca, muwaadinimada, socdaalka iyo siyaasada Lacagta.
4. Soomaaliya weligeedba doorkeedu waxuu ahaa in aynaan waddamo wallaalo ah la kala safan oo marwalba laga shaqeeyo wadajirka waddamada Carabta, Afrika iyo kuwa Islaamka ah. Doorkii Soomaaliya ee Heshiiskii Camp David ee dhamaadkii 70-naadkii waxuu ahaa in Soomaaliya ay diidday in xiriirka loo jaro dalka Masar, taas oo keentay in markii danbe ee ay waddamadii Carbeed heshiiyeen in go’aankeenii dhex-dhexaadka ahaa la wada ammaanay. Sidoo kale go’aankan muranka wadamada Khaliijka qaarkood oo Golaha Wasiiradu maanta mar-labaad ayiday, waxaa soo dhoweeyey shacabka Soomaaliyeed meel walba oo ay joogaan iyo weliba beesha caalamka.
Go’aankan ka soo baxay Golaha Wasiirada ayaa ku soo beegmaya, iyadoo war saxaafadeedyo ay soo saareen qaar ka mid ah Maamul goboleedyada ay ku taageereen Isbaheysiga Sacuudiga iyo Imaaraadka, kuna baaqay in dowladdu dib u eegis ku sameyso mowqifkii dhex dhexaadnimada ahaa
