Wararka aan ka heleyno duleedka Magaalada Laascaanood ee Xarunta Gobolka Sool ee Somaliland ayaa waxaa ay sheegayaan in saacadihii lasoo dhaafay halkaas uu ka dhacay Shil gaari oo khasaare geystay.
Shilkaan ayaa waxaa uu ka dambeeyay, kadib markii gaari ay la socdeen Guddoomiyaha iyo ku-xigeenka Guddiga doorashada Somaliland ee degmada Caynaba uu ku dhacay gaari kale, xili ay marayeen labada gaari inta u dhexaysa Laascaanood iyo Caynaba
Dad gooba tegay ayaa ku warramay in shilkaas uu dhaawac fudud kasoo gaaray Guddoomiyaha iyo ku-xigeenkiisa ee Guddiga doorashada Caynaba, isla markaana loola cararay Xarun Caafimaad, si xaaladooda loogu dabiibo.
Wararka ayaa intaas waxaa ay kusii darayaan inay jiraan dad kale oo dhaawac uu kasoo saaray shilkaas ee dhacay, waxaana gaadiidka isku dhacay ay kala ahaayeen gaari nooca raaxada ah iyo mid kale oo dad ay saarnaayeen.
Maalmo kahor ayey markii dad u socda Codbixinta doorashadii ka dhacda deegaanada Somaliland ay dhimasho iyo dhaawac ku noqdeen shil gaari oo ka dhacay duleedka Magaalada Berbera, waxaana xusid mudan in dhowr jeer halkaas uu dhacay shil gaari.
