Ra’iisul Wasaaraha Dowladda Federaalka Soomaaliya Maxamed Xuseen Rooble ayaa ku dhawaaqay in xukuumaddu ay $200,000 (Labo boqol oo kun oo Doollar) ku bixineyso dhismaha wajiga labaad ee garoonka diyaaradaha Degmada Caabudwaaq.
Ra’iisul Wasaaraha iyo Madaxweynaha Galmudug Axmed Cabdi Kaariye Qoorqoor oo gelinkii dambe ee shalay gaaray Caabudwaaq ayaa booqday garoonka diyaaradaha Caabudwaaq.
Rooble ayaa ku ammaanay bulshada degmadu sida ay isugu xilqaameen dhismaha garoonka diyaaradaha Caabudwaaq oo gaarayay 3KM, kaas oo kala bar ay bulshadu deegaanku dhiseen.
“Waxa uu Ra’iisul Wasaaruhu ballan qaaday in dowladdu kaalin hormuud ah ka qaadan doonto dhismaha garoonkan oo muhiimmad gaar ah u yeelanaya Caabudwaaq, Galmudug iyo Guud ahaan dalka” ayaa lagu yiri Qoraal kasoo baxay Xafiiska Ra’iisul Wasaaraha.
Dhanka kale Ra’iisul Wasaare Maxamed Xuseen Rooble ayaa booqday xarunta Jaamacadda Ummadda Soomaaliyeed ee magaalada Caabudwaaq, halkaas oo ay ku soo dhaweeyeen madaxda faraca jaamacadda iyo mas’uuliyiinta Galmudug.
