Ciidamo ka tirsan kuwa Booliska maamulka Galmudug ayaa duhurnimadii Maanta gacanta ku dhigay rag hubeysan oo saakay qof Caan ahaa ku dilay duleedka Magaalada Dhuusamareeb ee Caasimadda maamulkaas.
Saraakiil ka tirsan Ciidanka oo la hadlay warbaahinta ayaa u sheegay in ragga hubeysan oo maleeshiyaad ah lagu soo qabtay howlgalo kala duwan oo ay Ciidanka ka sameeyeen xaafadaha kala duwan ee Dhuusamareeb.
Ragga lasoo qabtay ayaa waxaa lagu xiray mid kamid ah Saldhiyada ku yaalla Magaalada Dhuusamareeb ee Caasimadda Galmudug, waxaana la sheegay in la horgeyn doono Maxkamadda, haatana ay ku socdaan baaritaano kala duwan.
Marxuumka la dilay ayaa waxaa lagu magacaabi Cabdullaahi Caabi Cali Afrax, isla markaana waxaa uu kamid ahaa ragga dhulka ka Ganacsada ee loo yaqaano dadaalka, kaasi oo duhurnimadii Maanta la aasay.
Israsaaseyn muddo kooban socotay ayaa saakay rag hubeysan oo maleeshiyaad ku dhexmartay duleedka Dhuusamareeb, kaasi oo uu ku dhintay Marxuum Cabdullaahi Caabi, waxaana israsaaseynta ay ka dhalatay muran la xiriira arrimo dhul.
