Laascaanood ( HM )-Xiisad colaadeed ayaa maanta oo talaado ah ka aloosan degaanka Tukaraq ee gobolka Sool kadib markii ay maalmihii u dambeeyay halkaasi isku ballaarinayeen ciidamada maamulka Somaliland ee ku sugan gobolkaasi Sool.
Somaliland ayaa gaadiid hubaysan soo dhoobtay jiidda u dhexaysa labada ciidan ee Puntland iyo Somaliland waxaana ay saddexdii maalmood ee u dambaysay wadday dhaq dhaqaaqyo ka duwan kuwii hore inkastoo aan weli la ogaan ujeedkooda.
Goob-joogayaal ku sugan Tukaraq ayaa soo sheegaya in Somaliland ay Gaadiid hubaysan iyo ciidamo horleh ka keentay Taliska Gooja-cadde kuwaas oo gelinkii dambe ee shalay soo gaadhay jiidda Tukaraq oo ay isku hor fadhiyaan Ciidamada maamulada Puntland iyo Somaliland.
Wararku waxay intaas ku daraya in sidoo kale dhinaca Puntland ay saaka ka socdaan dhaq dhaqaaqyo ciidan oo ku wajahan xiisadda ka dhalatay ciidamada Somaliland ku soo gurayso gudaha degaanka Tukaraq.
Maamulada Somaliland iyo Puntland ayaa marar hore ku dagaallamay degaanka Tukaraq iyo nawaaxigiisa balse mudooyinkii u dambeeyay xidhiidh wanaagsan ayaa ka dhexeeyay labada dhinac welina ma cadda sababta kicisay dhaq dhaqaaqyada ciidan ee hada kasoo cusboonaaday deegaanka.
Horufadhi News
Sawir hore
