Wasiirka arrimaha dibadda ee Maamulka Somaliland, Sacad Cali Shire, ayaa magaalada London kula kulmay xubno ka mid ah baarlamanka UK.
Wasiir Sacad Cali Shire ayaa sheegay inuu kala hadlay halka ay Somaliland siyaasadeedu ku wajahan tahay, gaar ahaan wixii ka dambeeyey doorashadii madaxtinimada ee deegaanada maamulka Somaliland ka dhacday Nofembar 2017.
Sacad Cali Shire ayaa sidoo kale tilmaamay in ay muhiim tahay in dowladda UK ay aqoonsato Siyaasadda Maamulka Somaliland isla markaana waxaa uu sheegay in uu ka dhaadhicinayey Gooni isku taaga Maamulka Somaliland.
Waxaa uu la kulmay xildhibaano ka tirsan dowladda Uk oo uu kala hadlay sidii Maamulka Somaliland loo taageeri lahaa, islamarkaana loo aqoonsan lahaa.
Maamulka Somaliland ayaa 27 sano waxaa uu raadinayey in mar uun bal aduunku u aqoonsado Dowlad ka madax banaan Soomaaliya inteeda kale balse ilaa hadda arintaas ma jirto waxa uga suura galay isla markaana kasoo naasacad ,waxaana ay xukuumad kasta bilaabantaa iyadoo aqoonsi raadinaysa waxaana ay dhamataa iyadoo aqoonsi raadinaysa.
Waa socdaalkii ugu horreeyey ee wasiirku uu Britain ku tago tan iyo markii uu hogaanka qabtay Madaxweynaha Maamulka Somaliland Muuse Biixi Cabdi.
