Muqdisho (HM)-Qoraal ka soo baxay dowladda Kenya ayaa lagu sheegay in ciidamada dowladda Soomaaliya ay ku soo xadgubeen madaxbanaanida iyo sharafta dhuleed ee dalka Kenya.
Dowlada Kenya ayaa qoraalka ay soo saartay waxa ay ku sheegtay in Golaha Amniga Qaranka dalkaas ay maanta kulan ka yeesheen eedeyn uu horey Kenya ugu jeediyey safiirka Soomaaliya ee QM Abuukar Daahir Cusmaan iyo weerar ay sheegeen in ciidanka Soomaaliya ay kusoo qaadeen qaranimada dalkaas.
“Xadgudubka lagu soo sameeyay dhulka Kenya waxa uu dhacay 2dii bishan March 2020.”ayaa lagu yiri qoraalka.
Ciidamo daacad u ah dowlada federalka iyo ciidamada Jubbaland ayaa maalinkaas dagaal ku dhex maray xadka kala qeybiya Soomaaliya iyo Kenya.
Dowladda Kenya ayaa qoraalka ay soo saartay ku sheegtay in ciidamada Soomaaliya ay burburiyeen hanti ay leeyihiin shacabka Kenya ee degan magaalada Mandhera.
Waxaa sidoo kale qoraalka lagu yiri “ficilkan waxa uu ka dhigan yahay weerar aan loo qiil-dayin oo ciidamo shisheeye ay sameeyeen si loo daandaansado Kenya.”
Kenya ayaa sidoo kale sheegtay inaysan sal lahayn eedeymaha ay usoo jeedisay dowladda federaalka ee ah in Kenya ay farogelin ku hayso arrimaha gudaha Soomaaliya.
Kenya ayaa ugu dambeyn ugu baaqday Soomaaliya inay joojiso “ololaha gefka ee ka dhanka Kenya iyo daandaansiga aan sababta lahayn, kuna mashquusho arrimaha guda dalkeeda.
