Wasaaradda Shaqada iyo Arrimaha Bulshada Xukuumadda Soomaaliya ee xilgaarsiinta ayaa fasaxday dhammaan Shaqaalaha Hay’adaha Dawladda Federaalka iyo kuwa gaarka ah.
Qoraal kasoo baxay Agaasimaha guud ee Wasaaradda Shaqada Cabdullaahi Maxamed Cali ayaa waxaa lagu sheegay in dhammaan Shaqaalaha Hay’adaha ay fasax yihiin maalinta Isniinta berri oo ku aadan bilowga sannadka cusub ee Hijriga 1443.
Agaasimaha Guud ee Wasaaradda Shaqada iyo Arrimaha Bulshada oo hambalyo u diray dhammaan Shaqaale-waynaha Soomaaliyeed ayaa u rajeeyay inay camal wanaagsan uga faa’iideystaan maalinta muhiimada u leh muslimiinta ee sanadka cusub ee Hijriga.
Inta badan dadka Muslimiinta ayaa Caawa indhaha ku haaya bilashada bisha Muxaram ee Sanadka cusub ee Hijriyada ee 1443, waxaana Khubarada Cilmiga Xiddigiska ay sheegeen in suurtogal aheyn in bisha Caawa la arko, isla markaana bisha si fiican loo arki doono habeenka ay soo galeyso Talaadada.
