Qarax sababay dhimasho iyo dhaawac ayaa saaka Ciidamo ka tirsan kuwa Ciidanka PMPF ee Maamulka Puntland waxaa lagula eegtay deegaanka sugurre ee Buuralayda Gobalka Bari, waxaana qaraxa laga helayaa faah faahino dheeraad ah.
Qaraxa oo miino dhulka lagu aasay ayaa waxaa lala beegsaday mid kamid ah kolonyo ay wateen Ciidanka PMPF, xilli ay howlgal ka wadeen agagaarka deegaanka sugurre ee Buuralayda Gobalka Bari, miinada ayaana qabsatay gaariga oo ay saarneyd Askar.
Inta la xaqiijiyey 4 Askari oo kamid ah Ciidanka PMPF ayaa ku dhintay qaraxa, halka 6 kalena ay dhaawacyo soo gaareen, kuwaasi oo durbadii la geeyay Isbitaal ay leeyihiin Ciidamada, sida ay sheegeen Saraakiil ka tirsan Ciidamada ammaanka Puntland.
Weli faah faahin kama aysan bixin Saraakiisha Ciidamada PMPF qaraxa khasaarah dhaliyey ee ka dhacay deegaanka sugurre ee Buuralayda Gobalka Bari, halkaas oo Ciidanka ka wadeen howlgalo amniga lagu xaqiijinayey.
Deegaano dhowr ah oo ka tirsan dhulka buuraleyda ah ee Maamulka Puntland ayaa waxaa ku sugan dagaalyahano ka kala tirsan Al-shabaab iyo Daacish, kuwaasi oo mararka qaarkood dagaal la gala Ciidanka Puntland, sidoo kalena geysta weeraro.
