Wararka laga helayo Magaalada Jowhar ee Caasimada dowlad Goboleedka Hirshabeelle ayaa sheegaya in halkaasi uu ka socdo dagaal xoogan oo u dhaxeeya ciidamada Hirshabelle iyo maleeshiyaad hubeysan oo macawiisley ah.
Dagaalka ayaa la isku adeegsanayaa hubka nuucyadiisa kala duwan, waxa uuna dagaalka ka socda qeybo kamid ah xaafada Hanti Wadaag ee ka tirsan Magaalada Jowhar.
Dagaalka ayaa wararka qaar sheegayaan in ay soo qaadeen kooxda Macaawiisley oo dhawaan laga xiray taliyaashooda, waxaana dagaal kala hortagay weerarka kooxdaasi ciidamada maamulka Hirshabelle oo adeegsanaya gaadiidka dagaalka.
Weli lama oga khasaaraha ka dhashay dagaalka ka socda Jowhar, shacabka ku dhaqan xaafadaha lagu dagaalamayo ayaa qaarkood bilaabeen barakac, waxaana Magaalada laga dareemayaa xaalad adag oo cabsi badan.
