Garoowe (HM)-Madaxweyne ku xigeenka maamulka Puntland Axmed Cilmi Cismaan (Axmed Karaash) ayaa gebi ahaanba qaaddacay guddiga doorashooyinka ku meel gaadhka ah ee uu magacaabay madaxweynaha maamulka Puntland Siciid Cabdullaahi Deni maalintii shalay.
Qoraal ka soo baxay xafiiska madaxweyne ku xigeenka maamulka Puntland oo lagu socod-siiyay Golaha Wakiilada Puntland islamarkaana la ogaysiiyay Xeer Ilaaliyaha guddoomiyaha Maxkamadda sare iyo Garyaqaanka guud ee puntland ayaa madaxweyne ku xigeenku ku qaadacay magacaabista guddiga doorashooyinka Puntland oo sida qoraalka lagu sheegay aan lagala tashan.
Sidoo kale madaxweyne ku xigeenka ayaa waxba kama jiraan ka soo qaaday magacaabista guddiga doorashooyinka Puntland maadaama sida uu sheegay ay baalmarsantahay Dastuurka Puntland oo dhigaya in madaxweyne ku xigeenka lagala tashado.
Arrinta ayaa waxaa ay bilow u noqon kartaa khilaaf soo kala dhex gala Madaxda ugu saraysa maamulka Puntland sida Karaash iyo Deni.
Qaadacada Axmed Karaash ee Gudigan uu magacaabay Deni ayaa waxaa ay imaanaysaa iyadoo markii ugu horeysay ay soo shaac baxdo inuusan Madaxweynaha la tashan ku xigeenkiisa waxaana jirin wax khilaaf ah oo hore loo ogaa iyago wada shaqayn wanaagsan lahaa mudadii ay joogeen Madaxtooyada Puntland Siciid Deni iyo Axmed Karaash.
Horufadhi News.
Warar sugan iyo Muuqaalo.
