Wararka ka imaanaayo magaalada Beladweyne ee Xarunta Gobalka Hiiraan ayaa ku warramaya in xalay ilaa saakay dagaalo ay ka dhaceen gudaha magaalada Beladweyne, waxaana jira khasaara dhimasho iyo dhaawac ah.
Dad goobjoogayaal ah ayaa soo sheegaya in hal qof uu dhintay dad ku dhow toban qofna ay ku dhaawacmeen, iyadoona dagaalka uu yahay mid u dhexeeya Ciidamada Dowladda iyo maleeshiyaadka Janaraal Xuud.
Ilo wareedyo ku sugan Beladweyne ayaa sheegay in dagaalka uu yimid, kadib markii maamulka HirShabeelle isku dayay in maanta shirkii ugu horreeyay ee Golaha Wasiirada uu ka dhaco Beladweyne.
Wararkii ugu dambeeyay ayaa sheegaya in weli dadka deegaanka ay maqlayaan dhawaqa rasaas xoogan oo labada dhinac ay isku adeegsanayaan dagaalka, mana jiro wax war ah oo kasoo baxay Maamulka.
HALKAAN KA DAAWO MUUQAALKA
Baladweyne ayaa waxaa horey uga dhacay dagaalo iyo banaanbaxyo looga horjeedo Madaxweyne Cali Cabdullaahi Xuseen Guudlaawe, waxaana duleedka Magaaladaas laga aas-aasay Jabhad uu hoggaamiyo Jeneraal Xuud oo kasoo horjeeda Maamulka Hirshabeelle.
