Warar dheeraad ah ayaa laga helayaa dagaal xoogan oo u dhexeeyay Ciidamo ka tirsan dowladda Federaalka Soomaaliya iyo rag hubeysan oo maleeshiyaad oo saacadihii lasoo dhaafay ka dhacay duleedka Muqdisho.
Dagaalkan ayaa sigaar ah uga dhacay deegaanka Jazeera ee duleedka Muqdisho, isla markaana waxaa uu dhexmaray maleeshiyo hubeysan oo u abaabulan hab beeleed iyo ciidamo ka tirsan kuwa Booliska Dowladda, iyadoo la isku adeegsaday hub Culus.
Dad la hadlay warbaahinta ayaa u sheegay in sababta keentay dagaalkaas uu yahay muran oo ka dhashay qaad la sheegay in si sharci darro ah looga soo dajiyey xeebta Jazeera, kaasoo laga keenay dalka Kenya.
Khasaaro isugu jiray dhimasho iyo dhaawac ayaa ka dhashay dagaalkaas dhacay. Inta la xaqiijiyey waxaa halkaas ku dhintay ku dhawaad 5 qof oo qaar ka tirsan ay yihiin dad Shacab ah halka tiro intaas ka badana ay ku dhaawacmeyn.
Dawladda Soomaaliya ilaa iyo hadda ma jiraan wax war ah oo ay ka soo saartay dagaalkan, waxaana meeshii lagu dagaalamay la wareegay ciidamo ka tirsan kuwa Dowladda.
