Taliyaha Ciidanka dowladda Federaalka Soomaaliya Gen. Cabdi Xasan Maxamed Xijaar ayaa Taliyeyaal Cusub u magacaabay Booliska dowlad Goboleedka Galmudug, isagoo sameeyay Isbedel deg deg ah.
Wareegto kasoo baxday taliye Xijaar ayaa taliyaha ciidanka booliska Galmudug loogu magacaabay G/Sare Khaliif Cabdulle Maalin, halka taliyaha gobolka Galgaduud loo magacaabay Sharmaake Cabdulle Warsame.
Sidoo kale taliye Xijaar ayaa Maxamed Mire Maxamed u magacaabay Taliyaha guud ee ciidanka booliska magaalada Dhuusamareeb, wuxuuna xilka qaadis ku sameeyay taliyihii hore, iyadoo taliyaha booliska Gaalkacyo laga dhigay Cali Xirsi Sahal.
Taliyaha ciidanka booliska dowladda federaalka Soomaaliya ayaa Faarax Xuseen Xasan u magacaabay taliyaha booliska magaalada Caabudwaaq, waxaana Taliye ku-xigeen looga dhigay Bilaal Xasan Cali.
Taliye Xijaar ayaa saraakiisha la magacaabay faray inay si deg deg ah xilalkooda ula wareegaan, isla markaana ay si toos ah u gutaan waajibaadkooda shaqo ee loo idmaday.
Sababta keentay Isbedeaalkan deg dega ah ayaa waxaa lagu sheegay, kadib markii maalmo kahor Saraakiil Ciidan lagu laayay inta u dhexeeysa Magaalooyinka Guriceel iyo Dhuusamareeb, kuwaasi oo loo dilay arrimo la xiriira aano qabiil.
