Badhan (HM)-Warar dheeraad ah oo hadda soo baxay aya xaqiijiyay in ciidamada maamulka Puntland ay dagaalka kuwa Somaliland ka qabsadeen gaadhi nooca Teknikada ah oo la socday wefdiga guddoomiyaha maamulka Somaliland u qaabilsan gobolka ay u bixisay Badhan Maxamuud Xaamud Cumar.
Wefdiga maamulka Somaliland oo ku socday dhinaca magaalada Badhan ayaa waxa weeraray ciidamo ka tirsan Puntland oo uu hoggaaminayo guddoomiyaha gobolka Sanaag Cali Xuseen Maxamed (Cali Soomaali) halkaasi oo dagaal culus ku ku dhexmaray labada dhinac.
HALKAN KA DAAWO WARKA DAGAALKA
Wefdiga waxaa lagu weeraray nawaaxiga degmada Hadaaftimo oo ku taalla galbeedka magaalada Badhan waxaana sida la xaqiijiyay dagaalka ku dhintay laba Askari oo dhinacyadii dagaallamay ah halka ay ku dhaawacmeen saddex askari oo kale.
Bulshada ku dhaqan Hadaaftimo ayaa sheegay in wefdiga Somaliland ay dib u laabteen islamarkaana ay Puntland ka qabsatay gaari Land Cruiser oo uu leeyahay guddoomiyaha Somaliland ee gobolka Badhan Maxamuud Xaamud.
Sidoo kale saraakiisha ciidamada maamulka Puntland ayaa hadda xaqiijiyay in ay wefdiga Somaliland ka qabsadeen gaari kale oo nooca Teknikada ah kaasi oo ay soo bandhigi doonaan sida sheegeen.
Ma jiro wax war ah oo ilaa hada kasoo baxay dhinaca maamulka Hargeysa kuna saabsan dagaalka gaadiidka ay Puntland sheegatay inay kaga qabsatay.
Wixii warar ee kasoo kordha isha ku hay Horufadhi News
