Faah faahino dheeraad ah ayaa kasoo baxaya Qarax Is-miidaamin ah oo galabta ka dhacay degmada Wadajir ee Gobolka Banaadir gaar ahaan Maqaayad ku taalla kasoo horjeedka Xerada Nac-naca ee Ciidanka Xoogga dalka.
Qaraxa oo uu fuliyey qof dhaxda kusoo xirtay Jaakad walxaha qarxa ah ayaa isku dhex qarxiyey maqaayadda oo ay xiligaas fadhiyeen Ciidamo ka tirsan dowladda Federaalka iyo dad shacab ah, oo halkaas ku shaah cabayay.
Khasaaro isugu jira dhimasho iyo dhaawac ayaa ka dhashay qaraxaas oo aad u xooganaa, waxaana inta la xaqiijiyay ku dhintay Afar ruux, halka dad ku dhow 10 qof ay dhaawacmeen, sida ay ku sheegeen goobjoogayaal.
Dadka waxyeelada dhaawaca soo gaaray ayaa waxaa goobta looga daad-gureeyay gaadiidka gurmadka deg-dega ah, isla markaana waxaa la geeyay Isbitaalo ku yaalla Magaalada Muqdisho, si xaaladdooda Caafimaad loogu dabiibo.
Al-shabaab warar ay faafiyeen ayaa waxaa ay ku sheegteen qaraxii galabta ka dhacay degmada Wadajir, iyagoona tilmaamay inay la beegsadeen Ciidanka dowladda, laguna dilay 20 Askari, halka tirro kalena ay dhaawacmeen.
