Guddoomiyaha Baarlamaanka Maamulka Somaliland Cabdirisaaq Khaliif Axmed ayaa ka hadlay dagaalka u dhexeeya ciidanka degaanka ee SSC iyo ciidanka Somaliland oo todobaadkii saddexaad oo xiriir ah ka socday magaalada Laascaanood ee Xarunta Sool.
Guddoomiye Cabdirisaaq Khaliif oo la hadlay warbaahinta ayaa u sheegay in waxa ka dhacay Laascaanood ay yihiin xasuuq ba’an oo shacabkii magaaladaas ku dhaqnaa loo adeegsaday awood xad-dhaaf ah, isla markaana ay ka muuqatay naceyb.
Isaga oo sii hadlaayay Guddoomiyaha Baarlamaanka Maamulka ayaa waxaa uu ku eedeeyay Madaxweyne Muuse Biixi Cabdi in uusan dooneynin in xal laga gaaro Colaada, uuna kala fur furayo xarig kasta oo lagu doonayo in lagu gaaro nabad, si xabada loo joojiyo.
“Madaxweyne Muuse, Badbaada maanta jirtaa waa in aad ciidamadeeda kala baxdaa deegaanada SSC, maanta berrito maaha, Haddii kale colaad raagta oo kalifaysa in aan dabka la kala qaadan ayaa ka dhalanaysa” ayuu yiri Guddoomiye Cabdirisaaq Khaliif.
Sidoo kale Guddoomiyaha Baarlamaanka Cabdirisaaq Khaliif ayaa ugu baaqay Somaliland in ay ciidamadeeda kala baxdo gobaladda Sool, Sanaag iyo Ceyn oo ay fuliyaan go’aankii ay gaareen Isimadda dhaqanka ee gobaladaas oo isku duuban.
Si kastaba hadalka Guddoomiyaha ayaa waxaa uu kusoo aaday, iyada oo ciidanka Somaliland isaga baxeen inta badan aagagii ay kaga sugnaayeen magaalada Laascaanood, halkaas oo maalmihii lasoo dhaafay dagaalo xooggan ay ku dhexmarayeen ciidanka maamulka iyo kuwa deegaanka ee SSC.
