Guddiga hirgelinta doorashada dowlad Goboleed ka Jubbaland ayaa saqdii dhexe ee xalay shaaciyay Jadwalka doorashada kuraas ka tirsan Golaha Shacabka Baarlamaanka 11-aad, kuwaasi oo deegaan doorashadoodu tahay Jubbaland.
Qoraal ay soo saareen Guddiga doorashada ayaa waxaa ay ku sheegeen in diiwaan-gelinta ergada iyo tababarka ergada doorashada ay bilaabaneyso maalinta berri oo sabti ah, halka diiwaan-gelinta Musharaxiinta ay bilaabaneyso 27-ka bishaan December 2021.
Sidoo kale Guddiga doorashada Jubbaland ayaa ku dhawaaqay in doorashada Lix kursi oo kamid ah kuraasta Golaha Shacabka la qabanayo 28-ka bishaan December, waxaana kuraastaas tirsigoodu kala yihiin HOP082, HOP108, HOP113, HOP134, HOP203 iyo HOP217.
Guddiga doorashada Jubbaland ayaa dhawaan soo saaray Liiska 14-ka kursi ee ugu horreeyay doorashada Golaha Shacabka Baarlamaanka 11-aad, halka weli aysan shaacin kuraasta ugu horreeysay ee doorashada maamulada Puntland iyo Hirshabeelle.
