Ra’iisul Wasaaraha Xukuumadda Federaalka Soomaaliya Maxamed Xuseen Rooble ayaa xalay shir guddoomiyey kulan gaar ah Golaha Wadatashiga Qaranka ku yeesheen aalada foggaan arraga ee ZOOM-ka.
Kulanka Golaha Wadatashiga ayaa waxaa looga hadlay Arrimo kala duwan oo ay kamid yihiin dhammeystirka howlaha doorashooyinka Golaha Shacabka Baarlamaanka 11-aad ee dowladda, xaaladda amniga iyo sidii wax looga qaban lahaa abaaraha ka jira dalka.
Golaha Wadatashiga ayaa isla gartay dardar-gelinta howlaha doorashooyinka Golaha Shacabka, maadaama maalmo kooban ay ka harsan yihiin waqtigii lagu heshiiyay in lagu soo gaba-gabeeyo doorashada Golaha Shacabka oo aheyd 25-ka bishaan Febraayo.
Muddo 15 cisho ah ayaa ka harsan tahay mudada 40-ka cisho ee loo qabtay in lagu soo gabagabeeyo doorashada Golaha Shacabka oo aan weli saddex meel labo meel aysan gaarin, illaa haddana la doortay illaa 110 Xildhibaa oo kaliya.
