Magaalada Muqdisho gaar ahaa Xarunta Dugsiga Tababarka ee Ciidanka Booliska Soomaaliya ayaa waxaa lagu wadaa in Maanta oo Isniin ah ay ka dhacdo Doorashada kuraastii ugu horreeysay ee Golaha Shacabka ee Gobolada Waqooyi ee Somaliland.
Doorashada dhaceysa oo laba kursi ah ayaa waxaa ku tartamaya Afar Musharax oo uu ku jiro Ra’iisul Wasaare ku-xigeenka Xukuumadda xilgaarsiinta ee Mahdi Maxamed Guuleed Khadar, waxaana uu u tartamayaa kursiga tirsagoodu yahay HOP239.
Sidoo kale xubnaha ku tartamaya doorashada labada kursi ee Golaha Shacabka ayaa waxaa kamid ah Biixi Iiman Cige oo kamid Afartii sanno ee lasoo dhaafay ku fadhiyey kursiga tirsagoodu yahay HOP237.
Musharaxiinta ayaa waxaa dooran doona 101 Ergo oo la soo xulay oo shalay tababar la xiriira doorashada loogu soo xiray Magaalada Muqdisho, sida uu VOA-da u sheegay Afhayeenka Guddiga Doorashooyinka Gobolada Waqooyi ee Somaliland.
Doorashada Maanta ka dhaceysa Xarunta Dugsiga Tababarka ee Ciidanka Booliska Soomaaliya ayaa waxaa goobjoog ka noqonaya xubno ka socda Guddiyada doorashooyinka Federaalka, xalinta khilaafaadka iyo kuwa Somaliland iyo Mas’uuliyiin kala duwan.
HALKAAN KA DAAWO MUUQAALKA
