Dagaalyahano ka tirsan Al-Shabaab ayaa Arroonimadii hore ee saaka oo Axad ah waxa ay Weerar ku bilowday qaraxyo ku qaadeen degmada Awdheegle ee Gobolka Shabeellaha Hoose ee Maamulka Koonfur Galbeed Soomaaliya.
Weerarka kadib, ayaa waxaa gudaha Awdheegle ka bilowday dagaal culus oo dhexmaray ciidanka xoogga dalka iyo dagaalamayaasha Al-Shabaab ee weerarka soo qaaday, waxaana dagaalka ka dhashay khasaaro dhimasho iyo dhaawac oo dhinacyada kala gaaray.
Dad ku sugan degmada ayaa waxa ay kusoo warrameen in inta uu socday dagaalka ay maqlayeen dhawaqa qaraxyo waaweyn oo ka dhacayay aaga saldhiga Awdheegle, iyagoo intaas kusii daray in xaalada weli ay tahay mid kacsan.
Saraakiil ka tirsan ciidanka xoogga oo la hadlay warbaahinta ku hadasha Afka dowladda ayaa sheegay inay ka hortageen Weerarkii Al-Shabaab kusoo qaaday degmada Awdheegle, isla markaana ay khasaaro gaarsiiyeen, waa sida hadalka loo dhigay.
Degmada Awdheegle ee Gobolka Shabeellaha Hoose ee dowlad Goboleedka Koonfur Galbeed ayaa marar badan waxaa weeraro ku soo qaaday Al-Shabaab, sidoo kale waxa ay horay ugu garaacday hoobiyeyaal gaystay khasaare isugu jiro dhimasho iyo dhaawac.
