Ciidanka ammaanka dowladda Federaalka Soomaaliya iyo kuwa Maamulka Galmudug ayaa sheegay inay ka hortageen qaraxyo laga soo buuxiyay Gawaari ah oo la doonayay in lagu weeraro goobo ku yaalla magaalada Dhuusamareeb ee caasimadda Galmudug.
Qoraal lagu baahiyay warbaahinta dowladda ayaa waxaa lagu sheegay in ciidanka ammaanka dowladda ay ka fashiliyeen laba gaari oo sidday qaraxyo, kuwaasi oo looga hortegay banaanka Dhuusamareeb, kadib xog ay heleen ciidamada .
“Ciidanka ammaanka ayaa saaka ka hor tagay laba gaari oo khawaarijta ay ka soo buuxiyeen waxyaabaha Qarxa oo ay doonayeen inay gudaha u galiyaan magaalada Dhuusamareeb” ayaa lagu yiri warka qoraalka ah.
Sidoo kale Qoraalka ayaa intaas lagu sii daray “Ciidanka Qaranka iyo Geesiyaasha shacabka deegaanka ayaa mudooyinkii ugu danbeeyay khasaaro AS ku gaarsiiyay howlgalada ka dhanka ah ee ka socda deegaanada Galmudug.
Madaxweynaha dowladda Federaalka Soomaaliya Xasan Sheekh Maxamuud ayaa muddo ku dhow saddexdood ku sugan magaalada Dhuusamareeb ee caasimadda dowlad Goboleedka Galmudug, halkaasi oo uu Madaxweynaha si KMG ah ugu shaqeynayo.
Maalmo kahor ayay ahayd markii Al-Shabaab sidaan oo kale ay qaraxyo ugu weerareen deegaan ay ku sugnaayeen Madaxweyne Qoor Qoor iyo xildhibaano ka tirsan Baarlamaanka Galmudug, waxaana xusid mudan in weerarkaasi uu dhaliyay khasaaro dhimasho iyo dhaawac leh.
