Qarax sababay khasaaro dhimasho iyo dhaawac ah ayaa xalay fiidkii ka dhacay magaalada Muqdisho gaar ahaan laamiga dheer ee mara degmada Dharkeenley agagaarka iskuulka lagu magacaabo Halgan, waxaana qaraxa kasoo baxaya faah faahino.
Qaraxa oo ahaa miino laamiga dhinaciisa lagu aasay ayaa mar qura qaraxday, sida ay sheegeen dad ku sugnaa meel aan sidaas uga fogeyn goobta, oo tilmaamay in la maqlay jugta qaraxa oo ahaa aheyd mid xooggan.
Dadka ayaa sidoo kale soo wariyey in qaraxa uu ku dhintay hal qof oo shacab ah, halka dhowr qof kalena oo joogay meesha ay ku dhaawacmeen, kuwaasi oo durbadii la gaarsiiyay xarumo caafimaad oo ku yaalla Muqdisho, si xaaladooda loogu dabiibo.
Wararka ayaa intaas kusii daraya in ciidamo ka tirsan kuwa xasillinta caasimadda ay gaareen aaga uu qaraxu ka dhacay, isla markaana ay bilaabeen howlgalo ay ku raadinayaan dadkii ka danbeeyay qaraxaasi, inkastoo aan la sheegin dad loo soo qabtay.
Laamaha ammaanka dowladda Federaalka Soomaaliya ayaa weli wax faah faahin ah ka bixin qaraxii khasaaraha dhaliyay ee xalay ka dhacay gudaha degmada Dharkeenley, Si kastaba Muqdisho ayaa waxaa mararka qaarkood ka dhaca qarax khasaaro geysta.
