Xulka qaranka ee Soomaaliya da’doodu ka hooseyso 17-ka sano ayaa ku guuleystay koobka ciyaaraha bariga iyo bartmaha ee Cecafa. Soomaaliya waxay 3-1 uga badisay xulka South Sudan.
Ciyaarta kama dambeysta ah ayaa haatan lagu soo gabagabeeyay garoon ku yaalla magaalada Addis Ababa ee dalka Itoobiya.
Xulka Soomaaliya ee da’doodu ka hooseyso 17-ka sano ayaa maalmihii lasoo dhaafay wacdaro ka dhigayay tartanka, waxay kasoo badiyeen Itoobiya iyo Uganda.
Soomaaliya ayaa hore isreebrebka 17-jirada bariga iyo bartamaha Africa 2022 uga reebtay xulalka Itoobiya iyo Uganda, iyadoo ciyaarta maanta ay garoonka buux dhaafiyeen taageerayaal Soomaali ah oo qaarkood mas’uuliyiin ay yihiin kuwaasoo uu ugu weynaa wasiirka dhalinyarada iyo ciyaaraha Soomaaliya.
Soomaaliya ayaa haatan u baahan iney Semi Final ka gaaraan koobka Qaramada Afrika ee 17-jirada kaas oo ka dhici doona Algeria horaanta sanadka soo aadan, si ay uga qeyb galaan Koobka Adduunka 17-jirada ee sanadka 2023 bartamahiisa lagu qaban doono dalka Peru.