Shil sababay dhimasho iyo dhaawac ayaa saaka ka dhacay inta u dhexeeysa tuulooyinka Dalsan iyo Xaaji khayr oo ka tirsan Gobolka Nugaal, sida ay sheegayaan wararka aan halkaas ka heleyno.
Shilkaan ayaa waxaa uu ka dambeeyay, kadib markii gaari nooca raaxada ah oo ku rogmaday laamiga u dhexeeya tuulooyinka Dalsan iyo Xaaji khayr, waxaana gaariga uu ka baxay Magaalada Garoowe, kuna sii jeeday Magaalada Boosaaso.
Inta la xaqiijiyay hal qof ayaa ku geeriyooday shilka, halka laba qof kalena ay dhaawacyo soo gaareen, kuwaasi oo dhammaantood saarnaa gaariga rogmaday, sida ay sheegeen goobjoogayaal halkaas ka agdhawaa.
Saraakiisha Ciidanka Taraafikada Gobolka Nugaal ee Maamulka ayaa sheegay in ay baaris ku hayaan sababta keentay shilka, iyadoona muddooyinkii dame shilalka gaari ay kusoo bateen degaano ka tirsan Puntland.