Weerar lagu dilay 7 kamid ah Askarta Ciidanka Jabuuti ayaa ka dhacay Saldhiga Ciidanka ee Garabtiisan ee waqooyiga dalka yar ee ku yaalla Geeska Afrika, kaasi oo ay fuliyeen kooxo hubeysan, sida lagu sheegay warka kasoo baxay dowladda Jabuuti.
Wasaaradda Gaashaadhigga Jabuuti ayaa sheegtay in weerarka looga dilay 7 Askari, afar kalena looga dhaawacay, isla markaana weli la la’yahay 6 Askari oo kamid ahaa Ciidanka Jabuuti oo ku sugnaa gudaha Saldhiga, xilligii uu weerarka dhacaayay.
Dhinaca kale Madaxweynaha Jabuuti Ismaaciil Cumar Geelle ayaa ka hadlay weerarka lagu dilay Askartooda, ee dhacay Saldhiga Ciidanka ee Garabtiisan ee waqooyiga dalka yar ee ku yaalla Geeska Afrika.
Madaxweyne Ismaaciil Cumar Geelle oo Qoraal soo saaray ayaa waxaa uu ku sheegay inay ka xun yihiin weerarka lagu laayay Askarta ka tirsaneyd Ciidanka dowladda Jabuuti, wuxuuna tilmaamay in dowladdu ay sharciga horkeeni doonto kooxda weerarka qaaday.
Jabuuti oo ku taalla mid ka mid ah marinnada maraakiibta ee ugu mashquulka badan dunida ee ay badda cas ku kulmaan gacanka Cadan, ayaa martigelisa saldhigga kaliya ee Maraykanku ku leeyahay Afrika iyo saldhigga ugu weyn ee ciidamada Faransiiska uu ku leeyahay caalamka.