Madaxweynaha Jamhuuriyadda Federaalka Soomaaliya Xasan Sheekh Maxamuud ayaa ka hadlay dagaalka xooggan ee maalintii shalay aheyd ka qarxay dalka Suudaan, kaasi oo u dheexeyay ciidanka Milateriga iyo ciidamada Gurmadka Degdega ah ee loo yaqaan RSF
Madaxweyne Xasan Sheekh oo soo saaray War ku qornaa luuqada English-ka ayaa waxa uu dhinacyada hubeysan ee ku dagaalamaya magaalada Khartuum ugu baaqay inay joojiyaan Colaada, isla markaana xiisada taagan lagu dhammeeyo wadahadal.
Sidoo kale Madaxweynaha Soomaaliya ayaa Beesha caalamka ka dalbaday inay kaalin weyn ka qaataan sidii loo qaboojin lahaa dagaalka oo laga cabsi qabo inuu magaalooyin hor leh ku sii fido oo ka tirsan dalkaas Suudaan.
“Xal kuma imaanayo Xaalada oo lasii huriyo iyo rabshadaha oo la sii kordhiyo kumana dhamaanayaan caqabadaha ay wajahayso Jamhuuriyadda Sudan,” ayuu Xasan Sheekh oo intaas kusii daraya in loo baahan yahay in xiisada Suudaan la qaboojiyo.
Maalintii labaad ayaa waxaa dagaallo xoogan oo u dhaxeeya laba garab oo ka kala socda ciidamada Dalka Suudaan ay ka socdaan Magaalada Khartuum iyo deegaanno kale oo duleedka ah.
Ugu yaraan 56 qof oo rayid ah ayaa lagu dilay dagaalka u dhexeeya ciidanka iyo kooxda gurmadka degdegga ah ee (RSF), sida ay sheegeen koox dhakhaatiir ah oo madax-bannaan.