Ciidamada ammaanka Maamulka Koonfur Galbeed Soomaaliya ayaa xalay saacado kooban xabsi ku yaalla Magaalada Baydhabo ee Xarunta Gobolka Baay ku xiray Wasiirkii hore ee Wasaaradda Gaashaandhigga Soomaaliya C/rashiid C/llaahi Maxamed.
Wararka la helayo ayaa sheegaya in Ciidamada ammaanka Koonfur Galbeed ay hotel uu Magaalada Baydhabo ka degnaa kala baxeen Wasiir hore C/rashiid C/llaahi Maxamed oo shalay gaaray magaaladaas.
Ciidamada Koonfur Galbeed ayaa su’aalo weediyay C/rashiid C/llaahi Maxamed oo saacado kooban hayeen, waxaana ciidamada la sheegay in markii dambe sii daayeen wasiirka dibna ugu celiyeen hotelkii uu degnaa.
Wasiirkii hore ee Wasaaradda Gaashaandhigga Soomaaliya ayaa hada u sharaxan Kursiga tirsigiisu yahay Hop197 ee doorashadiisa ka dhaceyso Baydhabo, waxa uuna halkaasi u tagay C/rashiid sidii u heli lahaa kursiga.