Wasiirka Wasaaradda Qorshaynta, Maalgashiga iyo Horumarinta dhaqaalaha Xukuumada Soomaaliya Jamaal Maxamed Xasan ayaa kulan la qaatay wafdi ka socday Hay’adda Qaramada Midoobay u qaabilsan Qaxootiga Aduunka ee UNHCR.
Wafdiga UNHCR waxaa hogaaminayay Ergeyga gaarka ah ee Bariga iyo Geeska Afrika ee UNHCR, Danjire Maxamed Cabdi Affey, Waxaa sidoo kale xubnaha wafdiga ka mid ahaa Wakiilka UNHCR Soomaaliya, Mudane Magatte Guisse iyo Madaxa Ilaalinta Bulshada ee Xafiiska Gobolka Bariga iyo Geeska Afrika Charles Mballa.
Kulanka ayaa diirada lagu saaray sidii xal-waara loogu heli lahaa dadka barakacayaasha ah ee ku nool gudaha dalka iyo sidii qaxootiga Soomaaliyeed ee kasoo laabanaya xerada qaxootiga Dhadhaab ee dalka kenya loogu abuuri lahaa jawi wanaagsan oo ay ku heli karaan waxyaabaha noloshooda aasaaska u ah.
Waxaa sidoo kale labada dhinac ka wada hadleen arimo dhowr ah oo la xariira hirgelinta Istraatijiyada Qaran ee Xalka-Waara ee ay soo diyaarisay Xafiiska Xalka-Waara ee Wasaraada Qorshaynta Soomaaliya.