Dowladda Turkiga ayaa War kasoo saartay Qarax Is-miidaamin ah oo shalay ka dhacay Magaalada Muqdisho gaar ahaan Bar koontarool oo ku taalla albaabka laga galo Xerada Xalane, kaasi oo sababay khasaaro isugu jira dhimasho iyo dhaawac.
War-saxaafadeed kasoo baxay Safaaradda Turkiga ee Muqdisho ayaa waxaa si kulul loogu cambaareeyay qaraxii Is-miidaaminta ahaa ee lala beegsaday Ciidamo ka tirsan kuwa Milateriga oo ku sugnaa Bar koontarool, iyagoona sheegay inay aad uga xun yihiin qaraxa oo loo adeegsaday gaari laga soo buuxiyey waxyaabaha qarxa.
Dowladda Turkigan ayaa tacsi u dirtay qoyska dadkii geeriyooday qaraxii ka dhacay degmada Wadajir ee Gobolka Banaadir, halka dadkii dhaawacyada soo gaareen ay Alle u weydiiyeen inuu Caafimaad deg deg ah siiyo, kuwaasi oo la dhigay Xarumo Caafimaad.
Sidoo kale Qoraalka kasoo baxay Safaaradda Turkiga ayaa waxaa lagu sheegay inay sii wadi doonaan taageerada ay la garab taagan yihiin dowladda Federaalka iyo shacabka Soomaaliyeed ee dagaalka ku jira Al-shabaab.
Ugu yaraan 10 qof oo u badnaa Askar ka tirsaneyd Ciidanka Milateriga dowladda ayaa ku geeriyooday qaraxa, halka tirro kalena ay dhaawacmeen, waxaana Mas’uuliyada qaraxaas oo Is-miidaamin ah ahaa sheegtay dagaalamayaasha Al-shabaab.