Hargeysa ( HM ) Somaliland dib u aqbashay Warqada Go-home oo ay hore u joojisey, taasi oo la goosan jiray marka la tagayo Magaalada Muqdisho.
Bishii April ee sanadkii hore ayaa Somaliland joojisey in bilaa Baasaboor ay kaga dhoofan garoonkeeda Cigaal International dadyowga ku wajahan caasimada Soomaaliya ee Muqdisho.
Go’aankan ay Somaliland dib ugu aqbashay in Warqada Go-home ay jartaan dadweynaha u dhoofaya Muqdisho, ayaa loo sababeynaya in hoos u dhac weyn ku yimid garoonka diyaaradaha ee Cigaal, mudadii ay joojiyen in bilaa Baasaboor looga dhoofo.
Ilaa iyo hadda, weli war rasmi ah kama soo bixin Xukuumada Somaliland, taasi oo ay ku shaacineyso go’aankeeda cusub , balse waxa xaqiijiyey saraakiil katirsan madaarka Hargeysa in dib loo soo celiyay in bilaa Baasaboor loogu duuli karo magaalada Muqdisho.
Sikastaba, Somaliland ayaa lumisey dadyow badan oo ka dhoofi lahaa garoonkeeda diyaaradaha Hargeysa, mudadii ay joojisey in bilaa Baasaboor loogu duulo magalada Muqdisho, taasi oo kaliftay in dadka reer Somaliland ee aan haysan Baasaboorka ay ka dhoofan garoonka diyaaradaha ee magaalada Garoowe, taasi oo sarre u qaaday suuqa duulimaadyada ee garoonka Garoowe.