Wararka aan ka heleyno degmada Doolow ee Gobolka Gedo ee Koonfurta Soomaaliya ayaa waxaa ay sheegayaan in Maanta halkaas ay degeen diyaarado siday Ciidamo badan oo ka tirsan dowladda Federaalka Soomaaliya.
Ciidamadan ah kuwa Gorgor ayaa waxaa Garoonka diyaaradaha Doolow kusoo dhaweeyay Taliyaha guutada 17-aad ee Gorgor Cumar Deeq Xasan, Guddoomiyaha labaad ee Gedo ee dowladda Nasteex Cabdi Saalax, Guddoomiyaha Doolow iyo xubno kale.
Ciidanka gaaray degmada Doolow ayaa waxaa hoggaaminayay Taliye lagu magacaabo Liibaan Xasan Cali, waxaana Ciidankaas loo gudbiyay Xarumo loogu tala-galay inay degaaan, iyadoona ka saameyn doona Saldhigyo iyo difaacyo.
Wararka ayaa intaas kusii daraya in Ciidamada ay yihiin kuwo aad u hubeysan oo wata hubka noocyadiisa kala duwan, isla markaana dowladda Federaalka ay geeysay Doolow, sida la xaqiijiyay.
Ciidamdan ayaa maanta ka degay garoonka degmada Doolow ee Gobolka Gedo, iyadoo laga qaaday magaalada Muqdisho, waxaana la sheegay inay qeyb ka yihiin xoojinta ciidamada dowladda ee la geynayo xuduudka Soomaaliya iyo Kenya oo xiisad culus u dhaxeyso.