Warbaahinta taageerta ururka Al-Shabaab ayaa sheegay in ururka Al-Shabaab uu gacanta ku dhigey diyaarad wax basaasta ee ah nooca aan duuliyaha wadin oo ku soo dhacday meel ku dhow magaalada Boosaaso.
Saraakiil katirsan Xarakada Al Shabaab oo ku sugan duleedka magaalada Boosaaso ayaa warbaahinta taageerta u sheegay in diyaaraddu ay kusoo dhacday deegaanada loo yaqaan Buuraha Calmadoow xilli halkaas ay muddo saacada ah dul heehaabaysay.
“Ciidamada mujaahidiintu waxa ay gacanta ku dhigeen burburka diyaaraddan oo loo malaynayo in ay leedahay dowladda Mareykanka ee sida tooska ah ugu lugta leh duullaanka lagusoo qaaday dalka Soomaaliya, ciidamo katirsan Al Shabaab ayaa gacanta ku dhigay diyaaradan waxayna ula dhaqaaqeen goob amni ah.”ayuu yiri sarkaalkan.
Diyaaradaha wax duqeeya ee aan duuliyaha laheyn iyo kuwa wax basaasa ayaa maalmihii lasoo dhaafay lagu arkayay iyagoo dul heehaabaya deegaano ka tirsan gobolka Bari oo Al Shabaab ay maamusho.
Warar soo baxayay saaka ayaa sheegayay in ciidamo si gaar ah u tababaran oo ka tirsan Maamulka Puntland ay howlgalo ka sameynayeen buuraha CalMadoow.