Wararka aan ka heleyno Magaalada Gaalkacyo ee Xarunta Gobolka Mudug ayaa waxaa ay sheegayaan in halkaas uu qarax Is-miidaamin oo aad u xooganaa, kaasi oo jugtiisa inta badan laga maqlay Magaalada.
Qaraxaas oo uu fuliyay qof isku soo xiray jaakad waxyaabah qarxa ah ayaa waxaa uu si gaar ah uga dhacay Al-baabka laga soo galo Garoonka Ciyaaraaha ee Cabdullaahi Ciise ee Gaalkacyo halkaasi oo ay ka socotoy Xaflada soo dhaweynta Ra’iisul Wasaare Rooble.
Khasaaro isugu jira dhimasho iyo dhaawac ayaa ka dhashay qaraxaas oo soo gaaray dad shacab ah iyo Askar ku sugneyd afaafka hore ee Garoonka, kuwaasi oo ka haayay goobta.
Ra’iisul Wasaaraha Xukuumadda Federaalka Maxamed Xuseen Rooble iyo Madaxweynaha Galmudug Axmed Cabdi Kaariye Qoorqoor ayaa ku wajahnaa halka uu qarxu ka dhacay.
Ilaa iyo hadda lama oga khasaraha ka dhashay qaraxii ka dhacay Magaalada Gaalkacyo ee Xarunta Gobolka Mudug, waxaana xaalad cakiran ay ka jirtaa gudaha Garoonka Cabdullaahi Ciise.