Laascaanood (HM)-Mas’uuliyiinta degaanka Soomaalida Itoobiya ayaa Khamiista maanta ah waxay sheegeen in ay gacanta ku dhigeen 22-bastoolad nooca Turkiga sameeyo ah.
Saraakiishan oo ka tisan Wasaaradda Dakhliga iyo Kastamka lana hadlay warbaahinta ayaa tibaaxay in hubkan ay ku jireen gaari noociisu yahay Isuzu oo ka yimid dhanka maamulka Somaliland.
Jaraa’idka Addis Standard ku waramaya in bastooladaha laga qabtay bar-gaadiidka lagu hubiyo oo ku taala magaalo xuduudeedka Tog-Wajaale ee dhacda xuduudka Soomaaliya iyo Itoobiya.
Warbixinadda ay bixiyeen saraakiisha amniga ayaa waxay intaasi raacinayaa in hal qof oo la tuhunsan yahay kaasoo la socday gaariga la dhigay xabsiga, isla markaana la waydiinayo su’aallo.
“Waxaan qabanay 22-xabo oo bastoolado nooca Turkigu sameeyo ah, kuwaasi oo ay la socdaan rasaastooda. Ujeedada, cidda lahayd iyo halkay kusii jeedeen waan baareynaa,” ayuu yiri sarkaal.
Dhacdadan ayaa waxay kusoo hagaageysaa iyada oo shalay bileyska Itoobiya uu shaaciyey in ay xireen shaqsiyaad isku dayey in ay fakiyaan Cabdi Maxamed Cumar [Cabdi Illay].
Madaxweynihii hore ee degaanka Soomaalida oo xiran tan iyo bishii August ee 2018-kii ayaa loo haystaa xadgudubyo dhanka bini’aadanimadda ah iyo qalalaaso ka dhacay gobolka.
Laamaha ammaanka oo heegan sarre ku jiray tan iyo markii gobolku ka dhacay xasaradihii isbedelka sababay ayaa howlgalo ay sameeyeen kusoo qabqabtay xubno lala xiriirinayo falal liddi ku ah nabad-gelyadda.
