Madaxweynaha Jamhuuriyadda Federaalka Soomaaliya Maxamed Cabdullaahi Farmaajo oo mudnaan siinaya darda-gelinta, horumarinta iyo joogtaynta hawlaha baaxadda leh ee horyaalla hay’adaha amniga ayaa xalay magacaabay Mas’uuliyiin cusub.
Wareegto uu soo saaray Madaxweyne Farmaajo ayaa waxaa marka hore lagu soo dhaweeyay istiqaalada uu usoo gudbiyay Agaasimahaha Hay’adda Nabadsugidda iyo Sirdoonka Qaranka (HNSQ) Fahad Xaaji Daahir Yaasiin.
Madaxweynaha Farmaajo ayaa u magacaabay Gaashaanle Sare Yaasiin Cabdullaahi Maxamuud, oo haatan ah Taliyaha Nabad Sugidda ee Gobolka Banaadir, in uu si kumeel gaar ah u hoggaamiyo Hay’adda Nabad Sugidda iyo Sirdoonka Qaranka inta laga soo magacaabayo taliye cusub oo ku yimaada hab waafaqsan sharciga iyo Dastuurka KMG ee dalka.
Madaxweynaha ayaa sidoo kale u magacaabay Fahad Yaasiin Xilka La-taliyaha Amniga Qaranka ee Madaxweynaha Jamhuuriyadda Federaalka Soomaaliya, xili uu xilka qaadis ku sameeyay Ra’iisul Wasaare Rooble.