Xildhibaanada dowlad goboleedka Jubbaland oo maanta kulan ku yeeshay magaalada Kismaayo ayaa ku meel mariyay golaha Wasiirada cusub ee maamulkaasi uu dhawaan magacaabay Madaxweyne Axmed Madoobe.
Kulanka Baarlamaanku ku ansixinayeen Xukuumadda cusub ayaa waxaa soo xaadiray 51 Xildhibaan, waxaana ogolaaday Xukuumada 50, halka uu ka amuusay hal Xildhibaan mana jirin wax Xildhibaan ah oo diiday ansixinta Xukuumada cusub ee Jubbaland.
Madaxweynaha Jubaland Mudane Axmed Maxamed Islaam, ayaa Golaha Wakiilada uga mahad celiyay sida aqlabiyada leh ee ay u meel mariyeen Xukuumada Cusub.
Madaxweynaha ayaa tilmaamay in waajib culus uu horyaalo Xukuumada, oo ay kamid yihiin hormarinta dhaqaalaha, shaqo abuurka dhalinyarada iyo maamul dadaajinta.
HALKAAN KA DAAWO MUUQAALKA
Madaxweynaha ayaa xusay inay howlahaas oo dhan iyo kuwo kalaba door muhiim ah ka qaadanayaan dardar galinta shaqada ay tahay in xukuumadu ay ku qabato mustaqbalka dhow iyadoo kaashanaysa bulshada Jubaland.