Dowladda Federaalka Soomaaliya ayaa Maanta faah faahisay halka uu marayo dagaalka dhaqaale ay dowladda kula jirto dagaalamayaasha Al-shabaab, kadib shir jaraa’id uu Muqdisho ku qabtay Wasiir ku-xigeenka Warfaafinta Cabdiraxmaan Yuusuf Al-Cadaala.
Wasiir Al-cadaala ayaa waxaa uu sheegay in dowladda Federaalka ay ku guuleysatay inay xirto 250 Akoon iyo 70 Lambar oo Al-shabaab dadka lacagta ugu qaadi jireen, wuxuuna xusay in xogaas lagu helay in shacabka ay lasoo xiriireen lambaradii hore loo baahiyay.
Wasiir ku-xigeenka Warfaafinta Cabdiraxmaan Yuusuf Al-Cadaala ayaa u mahadceliyay shacabka Soomaaliyeed ee bixiyey macluumaadka lagu xiray 250 Akoon-ka, isagoo tilmaamay inay dowladda ay sii wadi doonto beegsiga Akoonada Shabaabka.
Dowladda federaalka ah ee Soomaaliya ayaa 23-kii bishii October ee sanadkii hore soo saartay digniino ku saabsan joojinta la macaamilka dhaqaale ee Shabaab, oo dagaal culus uga socdo qeybo kamid ah dalka.